我叫張樂仁，爹哋係當年儍到想喺15樓養牛牛嘅張繼聰，媽咪係謝安琪。𠵱家啲奶粉閒閒哋成300蚊一罐，條數都好襟計，為咗我未來幾年嘅奶粉錢，媽咪之前暫別樂壇嗰隻精選《TheFirstDay》出到第二版，我諗佢都諗唔到非情歌可以好賣成咁；爹哋就啱啱出咗第三張個人唱片《Kidult》，圍繞爹哋嘅成長同生活。
呢幾年好多興講一個叫PeterPanSyndrome嘅現象，即係有啲哥哥姐姐甚至中仔中女，好似小飛俠咁永遠唔願意成長，而呢班人就統稱Kidult。爹哋隻碟入面首《大細路》，短短2分7秒，真音假音變聲乜都有，歌詞又密，唱得又快，唔睇歌詞都聽唔清唱乜，不過原來爹哋係講用童心看世界，覺得做細路嘻嘻哈哈，開心過做大人。爹哋，如果成人世界真係咁複雜，我長唔長大好？
《四小強》內容同林狗叔叔首《男子組》真係差唔多，爹哋以前成日同班朋友一齊玩，今日各有各忙，好多日都聚唔到一次。爹哋明白大家嘅忙碌同生活，再用嗰啲招牌假音嚟唱，感覺好warm，當我出咗世，呢三個叔叔又可以同爹哋聚一聚。
好多人都話爹哋未同媽咪結婚前，對佢冇乜印象，冇法啦，唱作歌手喺香港真係好難撈，冇大公司撐仲難搞，《愛你你咪理》同《寧願晏D瞓》講同媽咪嘅感情生活，啱晒班報紙雜誌編輯自由發揮，增加爹哋嘅曝光率。《愛》嘅歌詞好肉麻，「已經收咗線，明明未夠兩秒我已經怕會情變」，對感情胡思亂想嘅程度仲犀利過女仔，唔怪得媽咪肯嫁爹哋；《寧》呢排電台插到爛，講真，首歌真係冇乜特別，又係爹哋例牌嘅R&B情歌，不過我口唱我心，點都感人過K歌歌手一日唱到黑嘅假情虛意，係咪？
《EasyGo》繼續圍繞爹哋嘅生活經歷，《GoodLuck》就係紀念一位亡友，兩首歌都貫徹咗《Kidult》嘅特色：明顯有heart，唔難聽，但亦唔特別好聽。勁難聽都起碼有人鬧吓笑吓，可以當負面宣傳，爹哋呢個情況反而仲尷尬。當年幫醫神叔叔寫個首《防不勝防》，melody一流，自己唱個啲都冇咁正；如果大家上過YouTube睇番爹哋年頭叱咤頒獎禮表演跳舞，都會覺得佢勁過某啲跳舞組合，爹哋應該仲有好多可能。爹哋，啲奶粉錢，靠晒你！
撰文：皇后大盜