時間：99年7月27日
地點：美國夏威夷
人物：林子祥
一失足成千古恨，阿Lam林子祥應該有深切體會，05年佢喺紅館因為失足跌落舞台機關，影響右耳聽力；不過相比於99年因為偷竊，搞到要留案底，構成嘅精神壓力應比肉體上嘅痛苦慘得多。
後悔認罪
99年10月3號，阿Lam被揭發喺同年7月27號，喺美國夏威夷威基基（Waikiki）希爾頓酒店裏面嘅免稅店度，偷咗一副價值75蚊美金（約580港元）嘅Polo太陽眼鏡，據稱案發時阿Lam獨自shopping，行行吓將太陽眼鏡放入袋，當值警衞喺閉路電視目擊成個過程，即時報警。其後阿Lam上庭認罪，罰咗75蚊美金同留案底。
事件曝光後，阿Lam同太太葉蒨文即舉行記者會交代事件，阿Lam話當日佢只係一時心不在焉，將副眼鏡放咗落袋，唔係有心偷嘢。因為佢想快啲了結件事，所以上庭認罪，仲話好後悔當時認罪㖭。
當年葉蒨文喺記招上力撐老公，不過近年女方被指與羽毛球教練過從甚密，兩公婆亦甚少公開晒恩愛。當初阿Lam為葉蒨文同吳正元離婚，𠵱家婚姻再現危機，希望今次唔好又失足變千古恨啦。
本欄逢周一至周六刊出