繼上個禮拜荷甲煞科冇得睇之後，今日英冠煞科又再次冇得睇！上個禮拜就係因為冇電視直播，今日則因為上屋搬下屋，搞到三色收費台個解碼器入面張卡唔見咗；冇咗呢張類似手提電話sim卡或相機memorycard嘅物體，就睇唔到三色收費台嘅節目，激死！睇嚟又係要一直「哺」住部電腦。
伯軍踢3箭頭入波必多
不過，好彩啲英冠戲碼一早度好晒，今日我嘅心水，就正正係有得直播嗰場普雷斯頓迎戰伯明翰（無線收費電視998台及now898台今日8:00pm直播）。呢場波勝負可能較為難估，因為普雷斯頓要力爭3至6名踢升班附加賽，而伯明翰則想保住「1哥」之位封王；不過，入球開「大」就相信冇走雞。
畢竟，普雷斯頓班前鋒一向都做到嘢，紐根特、艾爾文、歷格斯同埋奧米洛特都係識入波嘅球員，就算今場冇咗美羅，相信都影響唔大。另一邊廂嘅伯明翰，今季大部份時間都踢3前鋒，由賓特拿夥拍謝路美同埋麥舒菲爾，而喺季尾仲借得樸茨茅夫嘅老將射手高爾，前線簡直如虎添翼，唔係入唔到波呀？
如果係都要我揀呢場勝負，我就會揀普雷斯頓。因為佢哋主場一向有保證，而且之前我都講過，我最鍾意「追波」，而普雷斯頓近7場聯賽只1勝6負，今迎伯明翰好有反底feel，仲可以博佢哋半場就領先。
至於荷蘭盃決賽就由兩支剛失落咗聯賽錦標嘅球隊較量，由阿爾克馬爾對阿積士。阿積士今場有主力復出，少讓平/半梗係捧上盤啦！詳細請參閱AA9我嘅推介啦！
重心出擊
大細：普雷斯頓大
吾中
鍾情丹麥、荷蘭嘅大聯盟女神，可惜馬會仲未開美國波。