Zestra呢個英文字點解，八方相信冇幾多個香港人答得出，運輸署高官卻知少少扮道德重整會代表，指呢個字「可能令人反感，或帶有品味低俗或不雅含義」，令人聯想到性交，拒絕同名嘅性用品公司自訂車牌勾出嚟競投。公司提出司法覆核，女法官朱芬齡主持公道，話呢個係自創字，如果市民唔識呢隻用品，根本唔會諗到性交，判運輸署輸官司兼堂費，香港有咁開明法官，八方真係要大讚一句，好嘢！
堪稱女版印度神油
Zestra英文名冇乜人曉，中文名都幾抽象，叫做「適趣液」。八方上網搵料，睇落幾犀利：只供外用不可內服，聲稱可以解決女性性興奮同性高潮障礙問題，能夠增加女性官感、快感同滿足感，堪稱女版「印度神油」！
根據法官判詞，原來運輸署署長審批「適趣液」時唔係幾識趣，指香港人思想保守，若果街上有個車牌公然提及性或者性交，會引起公眾反對，或者會使人感到侮辱、作嘔及厭惡，係唔道德及淫褻，屬品味低俗及不雅。八方以為運輸署負責維持交通秩序，原來佢兼任特區訓導主任，企喺道德高地亂點一通。
朱芬齡法官就識趣得多，反駁話香港雖然以華人為主，但唔代表對提及性交會反感，而且香港社會成熟及多元化，公眾對呢啲問題自有判斷。言下之意，即係唔使一個署長指指點點。法官又爆料，指運輸署否決勾牌申請時，根本唔知大眾對Zestra呢種產品嘅認識程度，如果無人知呢樽係乜水，根本唔會心邪；佢更踢爆，原來審批委員會、警方、民政事務局同法定語文事務部，都無支持署長嘅決定㗎！
首宗自訂車牌訴訟
朱法官指呢單case關鍵，唔係審批標準係咪太嚴格，而係高官審批時，冇一套客觀基礎及標準就將申請打回頭，故裁定運輸署署長嘅決定係不合理，申請發還重審。呢宗係自有自訂車牌計劃後首宗訴訟，運輸署發言人話研究判詞後先考慮係咪上訴，暫時未知幾時拎Zestra出嚟拍賣。Zestra香港代理適趣亞洲有限公司總裁梁大偉話好開心贏官司，若投到個牌，會套喺公司車上，推廣性健康服務。然而經此一役，可能好多人識得呢隻性用品，高官可以話好多人會諗衰嘢喎，再申請審批時咪好弊！