花旗股市繼續推高，雖然收市仲有升幅，但現水平沽壓增加已經好明顯，下禮拜美國聯儲局又到期傾息口，美股或者會轉為橫行。
美股橫行對港股好唔好，睇番呢幾日個市嘅變化就應該當好睇，㗎仔休市，A股放假，港股班好友揸晒fit，昨日又推咗恒指上20800樓上，升159點。
滙控（005）升到阻力位，昨日開始回氣，中移動（941）威咗1日，又跌番轉頭，如果唔係地產股咁勇，港股都好難有咁好嘅表現。以為地產股只係炒落後，同埋趁下禮拜賣地炒番轉，原來仲唔止咁，昨日收市之後，地政總署就有嘢講，話一幅西九龍地皮被勾出，底價42億元，下月12日拍賣，睇嚟地產股升得咁勁，都係有春江鴨做嘢，𠵱家樓市氣氛幾好，加埋股市技術走勢同成交對辦，下禮拜會由地產股推高個市，至於可唔可以突破21000關，就要睇議息之後美股走勢，同A股開番之後點走，不過，放完長假第一個交易日做好嘅機會幾大，或者早市升咗上去先至掉頭回落。
信置C輪9132：大地產股升得咁勁，C輪梗係癲晒，升咗一段之後，下一輪升勢應該係二線股份比較勁，睇勻咁多隻，興業（480）走勢最靚，短線唔破6元起碼都見5.80元，可惜冇輪炒，不過信置（083）都唔錯，昨日大成交升破20日同50日線，喺18元收市，應該會試19.50元，破位睇21元，可以買啲信置C輪9132，昨收29仙，槓桿率6.2倍（有效3.8倍），對沖值0.63，正股升上19.50元，9132應該喺38仙樓上，正股升上21元，隻輪應該喺50仙水平，正股跌穿16.80元止蝕。