8號仔前副主席蘇澤光3月底突然唔do，內裏原因，坊間一直流傳唔同版本，到底係佢劈炮定係硬食李家二少嘅豉椒炒魷呢？僱傭雙方都未曾親口真情剖白，照道理，二少應該唔會再就呢件事多講，至於一直處於下風嘅「苦主」蘇生呢？噚日終於攝到靚位噏番兩嘴，還自己個清白兼向二少還拖！
蘇生𠵱家坐喺電影發展局做主席，噚日發展局開會，有一半到場記者都係為咗電盈單嘢，而蘇生亦非常之有備而嚟，企定定發表咗三點重要講話！蘇生話：「第一、我今次係自己辭職嘅，好多謝董事局同埋第二大股東，佢哋分別發表聲明感謝我；第二、實際上電盈舊年業績係冇倒退，因為前年有一次性賣嘢嘅收益（講緊日本檔Jeleco），今次同樣咁比，核心業務係冇倒退，反而有進步；第三，我今次辭職同花紅冇關！」
不過，蘇生露完呢三點就雞咁腳咁撇，留低一堆密碼解釋唔到，好似如果8號仔咁掂，點解佢會俾人減800萬花紅？間公司咁好點解要走？同二少係咪好似外間咁傳冇偈傾？係咪諗住返政府做官？總之講唔到點解合約未滿就走人！
其實蘇生上個禮拜lastday，但連farewell都冇，幾世態淡涼，對於行走江湖數十年嘅蘇生嚟講可能幾hurt㗎！至於點解要唔do？雖然佢冇講，但諗都諗到啦，好明顯咪唔得二少歡心囉！咁二少點解唔like佢就得佢兩個自己知，但有啲嘢唔係話三言兩語就講得明，好似一pair男女咁，起初因互相欣賞而喺埋一齊，最後因了解而分開！
[email protected]