𠵱家返深圳話咁快就到，唔少香港人都會喺深圳置業，據美聯調查，今年首3個月深圳樓價飆升咗三成。有深圳網友就埋怨香港人將深圳嘅樓價扯高，要喺網上發起禁止香港人買深圳樓運動。
抗議搶完女人又霸地
深圳網友空轉多才是硬道理指，香港人嘅收入比深圳打工仔高出幾倍，試問內地人點同香港人爭樓，「香港佬已經嚟深圳包二奶，搞到大陸光棍佬越嚟越多；呢樣唔多講，家陣仲得寸進尺，喺度買樓，霸埋深圳土地資源，叫我哋啲大陸人點生活？為咗停止深圳樓價暴漲，要堅決聯合起嚟，抵制香港佬喺深圳買樓！」
Silenceyun惟恐天下不亂咁話：「以後內地買樓都要睇戶籍，香港戶口買樓要畀樓價嘅4倍！」lifwhu亦同意，「呢個要求非常之合情合理，但中央政府又點敢咁做，佢哋寧願得罪大陸同胞，都唔敢得罪香港財主。」
爭取大陸孕婦港生仔
Rain28亦指：「大陸人去香港生仔，佢哋就嘈喧巴閉，搞好多限制出嚟，家吓嚟深圳買樓，佢哋嘅人工比我哋高咁多，我哋嘅政府一啲嘢都唔做，唔保護自己人。」網友機會還是有話：「大陸人去香港得唔到香港人嘅同等待遇，香港人嚟內地嘅待遇就比本地人好，𠵱家深圳好似變咗畀香港人享樂嘅公園，大部份大陸人嘅收入冇香港人咁高，喺深圳又冇立足之地，就算住落嚟都係低等公民，只能夠睇住人吃喝玩樂，自己就日日加班。」
Gdkelvin就唔多同意，「香港人都係中國人，喺自由市場裏面，唔應該限制香港人北上買樓，冇香港就冇𠵱家嘅深圳，深港關係唇齒相依。」
http://cache.tianya.cn/publicforum/Content/house/1/61140.shtm