有人忘情棄愛，出賣歷史；有人愛不釋手，朝思暮想。在一個健康的懷舊歷史市場上，沒有永遠的愛，也沒有永遠的恨，大家都得到滿足，記憶就此被保存下來。本土懷舊市場，經過多年沉寂，終於從冬眠中蘇醒，收藏家願意出貨，後來者亦有機會大開眼界，但最大快樂還是拍賣底價平到你唔信，幾百蚊買幾十年光陰又如何？
記者：馮敏兒
攝影：伍慶泉、馮敏兒
收藏家的天堂集會
本來專營香港傳統書畫及文物拍賣的普藝拍賣行，每星期都有拍賣活動，繼年初替一位收藏家拍賣大量私藏本土懷舊物品後，即捲起一陣懷舊旋風，行家、玩家、收藏家個個聞風而動，紛紛見好價而沽，見好貨就搶！今日下午舉行的「香港懷舊收藏品及文革收藏品」拍賣會，算是近年來最大規模的一次「本土」行動，文革珍藏加香港本土歷史文物，共有747件，乜都有，其中就包括李小龍的電影海報和劇照。
主持今次拍賣的李淵先生指出，香港認識懷舊、歷史方面的收藏人很多，但都很零星和鬆散，或者你可以在網上拍賣，但真正的拍賣市場便絕無僅有！香港其實有很多50、60年代的文物去了焚化爐，下場悲慘，拿去歷史博物館都未必收，所以保留文物的市場渠道很重要。
出奇招刺激懷舊市場
「我們不可能對市場全知，因為唔清楚，所以就以『無底價』開始，拍賣唔出就唔收錢，冇人同你爭，真可以$1拿走！」他說拍賣會有信條：「唔怕貨比貨，最怕你唔識貨！」玩家、藏家、行家（帶貨或開舖），大家齊齊玩便能做出成熟市場。他更說﹕「拍賣有好處，不但兩隻手就拍得響，而且兩個人就夠，一口一口對決，不斷衝擊心理關口。」而你的對手除了拍賣現場的80座位，還有13條電話專線，因為有很多行家，尤其一向收開某種類型文物的收藏家，唔願意俾人知嘛！
行家蝕畀「無底價」
行家Dick說從前零星也有一些懷舊拍賣會，但質和量都麻麻，這次算是有點規模。他說拍賣會給他店舖以外另一個門路，既可出貨，亦可入貨，「初時拍賣行開出的拍賣價有點亂來，因為拍賣行的人唔熟，到現在才算合理，他們近來推出無底價，見品種常見就要求『無底價』拍賣（第一口價是$50），早前我有件文革陶瓷，我以為一定有識貨之人，唔怕『無底價』，點知真係$50成交，自己實收得$40，成本都要$200喇！所以拍賣會真係有機會執到平貨。」（拍賣會的佣金為實際成交價15％，$3,000以上為10％）。不過月前一隻文革花白瓷「紅色娘子軍」的落槌價為18,400港元，是底價的360倍，就算蝕一次半次都冇問題喇！
燈神的尋寶圖
有「燈神」之稱的收藏家張少嵐說自己把所有錢都買了收藏品，30年來只管買，從不會賣。「我有三個家，香港一個，國內兩個，從前是家，後來都變收藏庫。」原來他的理想是要開一間屬於自己的「古燈博物館」，有超過300多件古燈收藏。
拍賣展場的快樂遊客
程先生說自己懷舊收藏玩得好雜，其中最精的算是大陸早年的電影海報，他喜歡拍賣會，因為隨時可能執到寶，見價錢平就有衝動。
懷舊及文革收藏品拍賣與展覽
地址：中環皇后大道中110號10樓（普藝拍賣行）
查詢電話：21229309
拍賣時間：2:00pm（文革）、4:30pm（懷舊）
網址：www.allarts.net
有底價：富貴版懷舊拍賣會遍地黃金
平民有平民的市場，富貴有富貴的世界，小市民的歷史同「大歷史」，當然有階級距離，但就算過千萬大家買唔起，都可以當睇名畫展，走入「得道大歷史」欣賞學習。月底舉行的超級「亞洲國際藝術古董展」，就是其中一個最可觀的拍賣會，除逾百國家的參展古董商外，今年連全球第三大拍賣行「寶龍」（Bonhams）亦到場舉行處女拍賣，主打中國現代藝術品。其中一幅由名畫家鄧乃榮繪於80年的油畫《黎明》，描繪49年毛澤東與周恩來等開會的歷史時刻；收藏家當年用260萬元購入，現在已是過千萬。不過亦有「廉價」的前衞藝術攝影作品，例如蒼鑫的《交流系列二》就只估價2萬5千至3萬！除了前衞作品，真正主角其實是吳冠中、齊白石、尤紹曾和陳盛鐸等大師，估值由百多萬到2、3百萬。中國藝術市場確是遍地黃金！
「亞洲國際藝術古董展」
5月25至28日，亞洲博覽館；寶龍拍賣會則於24至26日舉行預展，5月26日拍賣。古董展入場費100元，其間有多場由故宮博物院專家等主持的講座，亦免費提供古董估價服務。
查詢電話：27639011