滙豐將卓越理財全新包裝再推出，請一班貴客嚟慶祝派對，各行各業都有：陳南祿、李華明、王仁曼、施永青、甘國亮等，最特別係搵咗國際級巨星張曼玉做特別嘉賓，襯晒活動搞手、銀行界梁朝偉王冬勝。大班鄭海泉亦嚟捧場，佢無事一身輕，好順口咁話，活動嘅嘢問梁朝偉啦。佢就一心嚟捧場兼睇星！
佢好老實話未見過明星，有次同個女搭飛機，阿女話見到梁詠琪，但鄭大班就全程瞓覺睇唔到。佢話搭飛機去程通常埋首做功課，回程唔瞓覺咪煲戲囉，一程煲兩套，張曼玉嘅電影都睇過幾齣，只係噏唔出戲名啫。跟住華華問佢邊個提意搵張曼玉做特別嘉賓？鄭大班竟衝口話：「劉青雲！」原來係出爐影帝嚟咗，大班果然好興奮。
梁鑑章攝
[email protected]