成班老友記上星期入場睇「愛彼錶女皇盃」，本以為「爪皇凌雨」單挑「賞月」，點知殺出一個程咬金，何鴻燊嘅「爆冷」由世界一級騎師靳能殺出，輕易取勝。呢場練馬師約翰摩亞有計謀㗎，先由一匹「爆炸」苦纏放前嘅「小武士」，等「小武士」放唔甩，入到直路先至由「爆冷」殺上，「爪皇凌雨」、「賞月」冇得追。與靳能相比，「賞月」騎師、日本冠軍武豐相差何止一皮，香港賴維銘都叻過佢。賽後何四太笑到癲，現場觀眾可在電視睇到四太揮手搖頭嘅畫面。《蘋果》記者都醒，影到晒。另一面，日本陣營黑晒口面，馬主話以後都唔會畀武豐騎「賞月」！
愛彼錶最鍾意何鴻燊贏女皇盃啦，八百萬獎金濕濕碎，何生四太高興得咁緊要，隨時買番三四隻愛彼錶嚟獎勵自己。睇見愛彼錶咁威，馬主B就講：「另一隻名錶IWC就好似因賣廣告而招惹不滿。」
左丁山冇資格買靚錶，但睇廣告睇得多，都知道IWC以「機師之錶」（Pilot'sWatch）為號召，有乜麻煩呢？馬主B話《南華早報》（四月二十五日）喺頭版刊出一個八分一版IWC廣告後，收到唔少女士投訴，話呢個廣告有損空中小姐尊嚴咁話，咁緊要，返到屋企搵番四月二十五日《南華早報》睇廣告，睇完又睇，睇好耐先至明白。
此廣告嘅標題係Oftenseenonstewardesses'bedsidetable（經常在空中小姐床頭櫃出現）。咦，男裝錶，機師錶喎，點解會經常在空中小姐閨房嘅床頭櫃出現？空中小姐喜歡戴男機師手錶咩？標題之下係一隻手錶，下面有幾行細字，細字旁有一對男人小腿照片，小腿穿上男裝襪。咁係乜意思？男士在空中小姐房中出現，剝咗對鞋？還是啱啱穿上襪，預備鬆人？圖片隔籬嘅細字最後一句係Becauseitmeansyoucanaffordtostayinbedthatlittlebitlongerthanusual（因為這意味着你能在床上多躺一會），好似嗒落有骨，唔怪得一啲空中小姐對此廣告甚為感冒，有人打電話去《南華早報》投訴也。