香港總商會噚日舉行周年大會，同場仲選埋新任主席，由蔣麗莉膺選，成為總商會創立146年以嚟首位女主席。艾爾敦事前話明唔再競逐連任，不過唔係有新工作，而係手頭上嘅嘢已經夠晒忙。
大家對蔣麗莉應該了解唔少，華華不時都有提佢，呢一顆本港老牌工業家震雄集團蔣震嘅掌上明珠，99年攞過十大傑青，01年仲當選科技界傑出女士。
咁艾爾敦喺任內又有乜嘢特別政績呢？原來係佢一手促成制訂「清新空氣約章」，為本港環保出咗分力，總商會跟住約章做，用電量明顯減少咗一成，慳番嚟嘅部份款項約一萬蚊，就捐畀世界自然基金會。𠵱家共有600家企業簽署咗約章，下一步就係要企業落實執行，仲會頒個認證畀有做嘅企業。
講到環球經濟，佢話美元跌勢差唔多，如果美國經濟冇乜大變，美元再大跌空間有限，不過美元弱勢會令本港進口貨物價格上漲，加上油價高企，人民幣升值，通脹壓力會持續一段時間。
[email protected]