打工仔茶餘飯後最愛講老闆是非，網民kk5354便在香港討論區上，呼籲網民分享老闆趣事，並率先爆料，「我老闆試過同人傾傾吓生意，突然從褸袋拎部電話出嚟，叫個同事幫佢入首Twins嘅歌做鈴聲，個同事呆咗兩三秒，老細轉咗身佢至忍唔住笑。」
員工忍笑最辛苦
網民Didi的老闆就曾經透過手機向同事「求救」，原來有急事吩咐，「有次男老闆去咗廁所冇廁紙，打手機入office，叫佢個心腹拎卷廁紙救佢，全公司呆晒，老闆出返嚟，大家忍笑忍到死。」網民涼子也有類似經歷：「我老細都試過呀！嗰次得我同佢喺公司，佢大叫同我講無廁紙，真係笑到我趴喺度。」
除了廁所無廁紙出洋相外，原來有不少老闆都因為講普通話鬧出不少笑話。「我以前個老細，成日開住speaker同個客傾電話，又會打開房門，有次講講吓，個客同我老細講，叫佢不如講普通話啦，我哋聽唔明你講乜，我老細跟住答個客話：『我一直都係講緊普通話㗎！』就因為佢呢句，我哋大笑咗好耐。」