魏駿傑跟滕麗名拍拖九年，昨日有消息指兩人於數月前分手，昨晚魏駿傑在西貢接受本報訪問時，大方承認在個多星期前已搬離跟女方同居的住所，雙方都有為這一段情努力，他說：「發覺唔work，但大家唔使再猜測，大家都冇第三者。」他還大讚阿滕是一個好女仔，只是他自己沒有福氣。
魏駿傑與滕麗名拍拖九年，素有「連體嬰」之稱，昨日有報道指數月前二人秘密分手。昨晚魏駿傑在西貢接受本報訪問時，大方承認跟女友滕麗名結束九年情，明顯消瘦不少的傑仔表示：「大家一齊九年，痛苦程度差唔多，我已經搬走咗，都搬走咗成個禮拜，分手就幾個月前嘅事，不過醞釀就醞釀咗年幾，係大家協議分開，不過仲有聯絡，我剩係搬走自己嘅衫，其他乜嘢都冇攞，因為想令阿滕唔好有咁多變化，唔想影響到佢。」
恍如孤獨老人
傑仔續稱這個星期忙於搬屋一事，他說：「大家努力咗好耐，想唔分開，但發覺唔work，分手原因唔想講，只可以講阿滕係一個好女仔，大家唔使再猜測，大家都冇第三者。」
提到被報章拍下跟女性密密約會，傑仔表示對方是朋友的女朋友，大家只是一起去打羽毛球，他說：「輯相成個幾月前影嘅，人哋係情侶，今日阿滕都有打畀我，話使唔使幫我同記者講嗰個係朋友，不過我話唔使。」
剛分手的傑仔坦言這個星期連朋友也沒有聯絡，自己恍如一個孤獨老人，他並稱：「緣份嘅嘢，係我自己冇福氣，稍後我會返內地拍劇，我希望大家唔好再纏住阿滕，我都有sendsms畀佢，話如果有人追佢車，叫佢唔好同人飛車同唔好避。」
滕麗名避追訪
另一邊廂，滕麗名就沒有聽傑仔話，昨日刻意避追訪，記者查看她的通告，知道她需入廠拍攝劇集《和味濃情》，不過應該4時入廠化妝的阿滕一直未見影蹤，估計可能從後門進入，避開守候的傳媒。
跟阿滕同劇的陶大宇被問到可知拍檔跟魏駿傑分手？剛和太太離婚的大宇表示：「感情嘅嘢真係唔知，第三者更加唔方便講。」問他見到對方可會作出安慰？大宇說：「梗係唔會問啦，我好耐冇見傑仔，以前就成日一齊打羽毛球。」那麼可覺阿滕為情消瘦？大宇即說：「佢收錢喎，梗係要瘦啦。」提到拍這套劇後，戲中演員的感情也不太順利，大宇說：「唔利姻緣，利收視咪得囉。」
採訪：卓美娟 攝影：林德雄
