草蜢成員感情要好，經常自稱三位一體，但畢竟除了音樂事業有關連外，各人都有自己的人生路，際遇也各有不同，昨日41歲生日的蘇志威，繼大女兒君蕎後，其妻劉小慧於前日傍晚剖腹為他誕下第二位千金，成為他口中歷年來最好的生日禮物。草蜢似乎旺生女，年前結婚的蔡一智，也有一女點綴美滿家庭，日前他抱着愛女與太太周雪芳在跑馬地家庭樂時，乖女容貌更首度曝光。至於一直孤家寡人的蔡一傑，閒來將時間愛心奉獻給愛犬，日前便與兩名菲傭齊齊侍候小狗沖涼。
蘇志威弄瓦賀生日
娛樂圈豬BB一個接一個出生，繼陳錦鴻前日上午添丁後，原來劉小慧和蘇志威（阿細）的第二位千金也在前日傍晚6時許出世，小慧趕在草蜢明日赴新加坡宣傳前，在銅鑼灣聖保祿醫院剖腹誕下6磅半重女嬰，母女平安。
喜收大利是
阿細接受本報記者電話訪問時開心地說：「我哋冇特別揀日子開刀，只係預產期係呢個時間，睇醫生同醫院個期咋，我都未知改乜嘢名，要搵人提供呀，可能學阿智咁喺blog度叫fans提議啦。」他又謂大女兒一直渴望有弟妹陪伴，並說：「佢好開心，特別鍾意有個妹，可以一齊扮靚，小慧好精神，但唔可以食嘢住。」
問阿細會否獎勵老婆，他說：「佢鍾意乜嘢就買乜嘢啦，我都唔識浪漫嘢，我老婆生完一見到我，就問我覺得BB得唔得意同靚唔靚，個女好似我呀。」適逢昨日是阿細41歲生日，可算雙喜臨門，他說：「係呀，係咁多年嚟最好嘅生日禮物。」他謂蔡一智與蔡一傑已封了大利是給BB。
多人爭上契
昨午約3時，阿細帶着長女君蕎到醫院，他表示沒刻意追生仔，所以對女兒出生十分高興。逗留約兩小時後阿細便離開，他謂已有圈內外朋友爭着與BB上契，他說：「同邊個就留畀太太講啦，佢過兩日出院，我去咗新加坡陪唔到佢，不過佢會明白。」
此外，蔡一傑昨接受電話訪問，提到蘇志威再添一女時說：「阿細係兩個女嘅爸爸，希望佢日後更生性，要搵多啲奶粉錢，我係半個阿叔，我改咗別名木衞一傑後好lucky，所以我都幫BB起個別名當係禮物，希望為佢帶嚟好運，就叫豬妹啦。」對此阿細說：「豬年出世都好喎，豬好好運㗎。」而湯寶如昨日約2時探望小慧後離開，她透露母女二人都很健康，小嬰兒長得十分趣致。
採訪、攝影：娛樂突發組、王連連
