古巨基噚日以代言人身份去到秀茂坪商場，擔任位元堂分店剪綵嘉賓，獲武術師傅小四即場傳授健康操，對方仲要求基仔同佢較量一吓下盤嘅穩健性，最後基仔只係同小四師傅作狀擺甫士影相，又猛讚自己下盤好穩健，但係就叫大家唔好心邪諗錯咗係下體喎。
40歲生仔
除咗武術師傅外，現場又有一位中醫師幫基仔把脈，佢話基仔休息唔夠，有少少燥，不過身體其他方面都好正常，仲大讚佢個腎好有勁，基仔聽完之後表現得好放心，佢話：「我希望keep住個腎有勁到40歲，到時就係時候做爸爸！」
講到最近盛傳克勤就嚟做老竇，基仔表示如果未證實真偽嘅話就唔想多講，但當知道譚詠麟同黃杏秀先後露口風後，佢就話：「如果係，我就要恭喜佢喇！」
講錯店名
另外，噚日擔任司儀嘅鄭啓泰竟然講錯嘢，話個活動係余仁生嘅開幕禮，此話一出當堂嚇到佢標冷汗，最搞鬼係當鄭啓泰用紙巾抹汗時，又有啲紙屑黐喺塊面度，鬼馬嘅基仔即時講笑咁話：「下次記住要用Tempo喇！」引得哄堂大笑，成功緩和尷尬氣氛。