陳奕迅（Eason）早前說要學習慎言，但繼直指濱崎步在個唱咪嘴後，他前晚出席大學校園騷時斥責政府浪費公帑，因為有的士司機告訴他，在港台做兼職，每日上班4小時便可獲12,000元月薪，相較Eason的助手每日開工15小時只得8,500元月薪高得多。好工難求，其實會不會是Eason的助手人工偏低呢？
陳奕迅前晚於樹仁大學舉行「MOOV撻著校園撻著Eason」Live音樂會，他繼年前在台灣校園騷發生「爆蛋」意外後，首次再舉辦校園個唱，吸引逾千學生迫爆禮堂。Eason毫不忌諱地紮紮跳，又在台上換T恤，露出白滑豬腩肉。
誤講有味笑話
向來愛說話的Eason前晚唱得興奮，忍不住斥責政府浪費公帑，他解釋新歌《月黑風高》的由來時說：「我唱歌之外最鍾意講嘢，有一晚搭的士同個司機吹……」引得全場學生爆笑，以為Eason說有味笑話，但他卻摸不着頭腦地問：「使唔使咁好笑呀？我成日遲到都係因為喺樓下同看更吹，明知遲都堅持要同佢吹。」學生繼續狂笑。
Eason返回正題道：「我問司機做乜夜麻麻要揸的士，佢話鬼叫個仔讀到書咩，每年大學學費要68,000蚊。」此時有學生大叫：「呃佢咋？40,000幾咋喎。」Eason驚訝道：「吓？佢吹到咁行？政府亂使錢呀，佢個仔喺港台做part-time，每日返4個鐘，收12,000蚊一個月，我助手人工8,500，每日開工15個鐘，仲要隨時oncall，不過呢頭講呢頭散，死喇，我公司高層開始頭痕，我將呢個故事講畀林夕知，寫首勵志歌囉！」
事後問Eason怕不怕因此得罪港台？他說：「12,000蚊係的士司機吹，應該係個司機吹得行，學費都吹到咁咯。」問他會否加助手人工？他笑說：「唔係我請㗎，我請就唔係呢個數，有機會摸陳奕迅同幫陳奕迅攞嘢，梗係要平啲。」
唱唱吓眼濕濕
此外，Eason唱《不如不見》時，投入得眼泛淚光，他事後謂當時想起湯漢斯（TomHanks）與美琪賴恩（MegRyan）在《緣份的天空》（SleeplessInSeattle）中的劇情，相距甚近卻遇不見，Eason說：「不過我諗唔起阿徐（徐濠縈），因為我成日見到佢。」Eason整晚紮紮跳，問他沒有「爆蛋」陰影？他說：「係呀，唔諗得咁多啦，唔記得晒啦！」
採訪：馬建華 攝影：仇志德
