上星期日會計Ｃ有馬出場，喺沙田馬場沙圈內與家人一齊出現，其中有三位年青人，應該係會計Ｃ嘅子姪輩，會計Ｃ話：「佢哋啱啱考完高級程度試，帶佢哋嚟馬場見識吓。」左丁山順口問吓佢哋想入大學讀邊科，答案係會計或者數學、理科等。會計Ｃ係會計名師，佢嘅子姪讀會計一啲都唔出奇，不過左丁山多口講：「讀數學啦，有天份就應該讀數學。」
有讀者來電郵鬧左丁山教人唔好讀商科會計，有教人「何不食肉糜」之感。呢層左丁山唔承認，總之各自按環境選擇啦。
次日回到辦公室，打開《金融時報》，有一篇講全世界薪酬最高嘅大人物（二○○六年總薪酬，十七億美元或一百三十三億港元），就係對沖基金RenaissanceTechnologies嘅總裁JamesH.Simons，呢個基金管理二百五十億美元。呢位西蒙斯先生今年六十九歲，人哋（StephenSchwarzman，私募基金大王）慶祝六十歲生日，開大型派對，請洛．史釗活現場演唱，花錢如倒水。但九年前西蒙斯慶祝六十歲生日，佢就辦一個數學學術會議，討論幾何學專題！
悶唔悶死人呀？原來西蒙斯本人係柏克萊數學博士，第一份工就係到越南戰場分析軍事密碼，後來佢批評越戰被炒魷，到哈佛MIT教書，跟住到紐約StonyBrook（石溪）大學數學系，業餘炒股，一九七八年就創辦Renaissance基金，至今成為世界上最巴閉嘅投資者，表現遠勝索羅斯。佢間基金請咗一百五十人，全都係Ph.D（博士），未去過華爾街做事嘅，專長由語言學至太空物理學，天文學都有。
成班科學家一齊炒股，贏晒華爾街專家，靠啲乜？咪數學囉，唔係會計財務。西蒙斯手下搜集所有公司嘅所有數據，分析現貨期貨合約，得到一大堆「表象」，就交由天文學家去消除「雜物」，呈現一幅清晰景象！據此投資，凡人都唔知佢哋做緊乜！西蒙斯成日話美國學生數學理科水皮，嚴重削弱競爭力，故此捐錢成立一個MathforAmerica基金會，向中學生推廣數理。如此人物，丘成桐可否請佢嚟香港演講？