軍情飛有時害死人，星期一紐卡素作客雷丁，賽前吹風奧雲復出，搞到引唔少下盤飛，結果紐卡素竟然輸波。今周紐卡素回師主場對布力般流浪，馬會足智彩淨係開「主客和」，一注夠數，揀個布力般客W。牽牛
紐卡素係英超一支幾惹飛嘅球隊，雖然實力只屬中游，但一有風吹草動就有飛到；今仗係奧雲今季第1次係主場打波，加上艾美奧比、尼索比亞等攻擊球員復出，可以預期主隊會越賣越熱，不過奧雲養傷10個月，要佢打一兩場波就有利物浦時期嘅水準，真係冇咩可能。
紐記主場唔識入波
而且紐卡素名副其實高不成低不就，來季打歐洲賽又冇佢份，降班又唔到佢哋；領隊路達帥位又不穩，一路有傳前保頓領隊艾拿廸斯會接手，紐記軍心真係唔多好。或者有人仲迷信紐卡素嘅聖占士主場威力，不過呢班波已經連續4場主場冇波入，紐記今仗繼續入球荒的話，你話點贏?
布力般就唔同，領隊曉士恨打歐洲賽恨到發燒，表面上距離第7位嘅雷丁有7分，要最後3場贏晒，兼雷丁係咁輸波，先可以直接踢歐協盃，機會好似好渺茫；不過大家唔好唔記得圖圖盃，布力般仍然要爭取更高排名踢圖圖盃，變相有望轉戰歐協盃，所以布力般戰意一定好過紐記。
仲有布力般出晒名係「暴力般」，雖然「茅王」沙維治唔出得，其實防守中場莫高拿、中堅基斯杜化森巴等都十分硬朗，「辣」人唔眨眼；奧雲剛剛先好番，一心想喺歐國盃外圍賽，披上英格蘭戰衣重振雄風，呢場無關痛癢嘅聯賽，一定怕傷多過想入波啦。
博盧頓爆冷贏新特蘭
冷門方面，推介篤定來季降落英甲嘅盧頓，主場謝幕戰打低新特蘭；講真，盧頓呢班波唔抵幫，不過篤定降班之後，球員好似冇晒壓力，上仗作客擊敗修安聯，叫做終止4連敗走勢；新特蘭話就話要爭英冠冠軍，不過已經同伯明翰雙雙篤定升上英超，實際意義不大，球員亦都充滿慶祝feel，話晒盧頓主場都贏過伯明翰，呢個5.5倍主W，博得過㗎。
投資特攻隊金句
「布力般流浪正力爭歐洲賽參賽資格，圖圖盃都唔放過，紐記主場又陷入球荒，唔使諗，2.8倍客W去馬。」
熱選大藍籌
星期六11
主客和
布力般流浪勝（2.8倍）
評語：紐卡素主場陷入球荒，連續4場冇波入，布力般單W有分頭抵博。
冷選23線股
星期日16
主客和
盧頓勝（5.5倍）
評語：盧頓篤定降班，新特蘭肯定升班；不過盧頓主場謝幕，又有打敗伯明翰往績，冷W可敲。