臨近歐洲主要足球國家嘅球季季尾，部份地方聯賽冠軍已塵埃落定，反而歐洲盃賽，尤其歐聯呢個頂級賽事，進入到4強階段之後，各支球隊都肯定有番咁上下實力，對碰之下，再唔會有咁多強弱懸殊局面出現；無論首回合定次回合，勝負分野，大多都係1球上落。
1球上落博「單」夠數
咁嘅場合，其實要估邊隊成為勝方，都唔容易；歐聯4強兩回合有晒結果，都係由主場球隊贏波，話易估又唔係，想拗頸博和又要輸晒，4場「大細」又各佔兩場，更加冇得捉路；如果捉住「1球上落」呢一點，買「單」就全部收錢嘞！
歐協盃又係咁啱，雖然截稿時仲未知次回合兩場比賽戰果，但首回合兩場波，雖然都出現咗愛斯賓奴主場大炒雲達不來梅3:0呢瓣冷門波膽，但連同奧沙辛拿贏西維爾1:0，又係全部開「單」數，食住呢條水真係收咗6場錢；而且「單」，一般亦屬於有較高水派彩嘅一瓣，以後撞正呢啲緊湊大戰，就算平時對「單雙」及「總入球」等較偏門下注項目唔多沾手，都值得轉吓思維考慮一下。
馬後炮一輪，講吓歐聯決賽盤口，有外圍瞬即開AC讓平/半，下盤低水；雖然仲有排至開波，兩隊軍容隨時變，相信華度到時都寧願向足智彩「冠軍」出擊，估最後冠軍好過齋玩90分鐘亞洲盤。文：華度