華華有個喺會計師樓做嘅朋友，望穿秋水終於捱到「五．一」，佢話呢個日子今年對佢別具意義。話說港交所喺00年已經提出，取消主板上市公司喺報章刊登公告嘅建議，去年仲向公眾諮詢，本來呢項係一個德政，尤其上市公司公布業績，就算公司幾奀，一個全版廣告唔少得，喺中英文報紙各登一版，起碼幾皮嘢落樓。
據聞，舊年尾到今年初，上市公司陸續收到港交所嘅信，話今年4月中某日之後公布業績嘅上市公司，只需要喺報紙登個廣告仔，通知股東上網睇業績就得。上市公司想慳，好多都延遲喺限期後先開董事會同公布業績。
驚寄唔切做到氣咳
問題就嚟嘞，由於上市公司開董事會，要7個工作天之前通知港交所，當佢哋喺4月初知會港交所會開董事會嘅時候，港交所先同佢哋講，取消刊登公告嘅新制度喺6月25日先實施。
其實港交所喺3月23號出咗新聞稿，話會喺6月25日先執行新例，但4月初有復活節加清明長假，就算上市公司想提早開董事會都唔得。
個老友話佢個客好激氣，開頭諗住慳幾萬蚊，所以延遲開董事會公布業績，但所有12月年結嘅上市公司，最遲要4月30日將年報寄畀股東。問題係舊年尾至今年，好多新股上市，部份都係12月年結，同樣要公布業績兼印發年報，呢啲新上市嘅公司，股東唔係幾千個，而係數以萬計，中央結算嗰邊驚寄唔切，所以提前要上市公司最遲27號send啲書過去，得嗰十幾日。就係咁，大批上市公司谷埋喺4月最後嗰兩個禮拜，一齊公布業績、印年報，會計師、其他中介人、印刷公司全部做到氣咳，咁你知點解今年5月1日對佢哋意義咁大啦。
[email protected]