北京來客到港，旅遊食家Ｌ安排成班老友與北京客傾吓偈，傾乜都得。就係唔准講上市計劃。唔准講上市，講乜好？北京客人立即話：「講小甜甜啦，呢單新聞轟動大陸，新浪網上有關小甜甜千億遺產嘅新聞，最多人hit！」小甜甜死後，仍然霸住報紙頭版，聞名海內外，呢份功力認真唔簡單，不過大家對小甜甜與風水師的故事，所知係咁多，目前冇乜新料，但北京客已經聽得津津有味，佢認為如果第日唔搬上銀幕，簡直嘥料。
講起小甜甜，日前本欄提及陪審員，立即畀讀者Ｓ鬧，來電郵提醒民事官司唔需要陪審團，一位大律師Ｙ來電郵叫左丁山唔好亂噏，話除咗誹謗案之外，民事訴訟唔用陪審員。真係驚。多謝各方指點。
《蘋果》讀者甚多高手，寫錯嘢實會畀人鬧。呢日到洲際酒店出席宴會，坐正富翁Ｙ隔籬，富翁Ｙ做紡織貿易發達，轉型為電腦商，財富更上一層樓，佢問左丁山：「你喺邊張報紙寫稿？」左丁山講完，富翁Ｙ話：「我只睇《信報》、《明報》，唔怪得冇睇過你寫稿！」點知富翁Ｙ隔籬有一位IT商人，亦係大馬主，立即講：「我日日睇《蘋果》㗎，你係唔係左丁山！」唯有講句nocomment。
呢啲問題見過唔止一次，答案無謂太揚。富翁Ｙ為人正經正派，所以佢認為香港只有三份報紙佢值得睇，就係《信報》、《明報》、《南華早報》。不過如此一來，啲正經人嘅新聞觸覺就唔夠sharp。但對佢哋冇乜所謂啦，發達上晒岸咯，對普羅大眾生活新聞使乜知咁多。左丁山做呢行，乜報紙都睇，亦留意其他人睇甚麼報紙以及想搵出人哋選擇報紙嘅理由，發覺好多有錢上年紀嘅人多數睇《信報》，馬主廂房馬場會員廂房內，幾乎係《蘋果》馬經天下，啲阿太唔鍾意刨馬就係齋睇《蘋果》Ａ叠或《蘋果》娛樂版，其他報紙真係少見啲喎。唔睇《蘋果》而專心刨馬嘅，揸住《大勝》居多，《新報》馬簿次之，《幸運》第三；至於公眾棚，左丁山甚少涉足，唔知道普羅馬迷多數睇乜嘢報紙。當然有啲人嘅眼光有政治性，譬如小甜甜訃聞廣告，兩張報紙全港獨冇，就係《蘋果》與《商報》。