黃金集團（1031）宣布於柬埔寨搞足彩，噚日復牌股價勁升40%，升幅都算誇張。黃金集團做開賭場生意，點解忽然涉足賭波？其實東南亞一向都好多人鍾情賭波，只不過以往啲賭注去咗黑市賭波市場，以泰國為例，當地人就相當鍾情於賭波。如今規範化做足彩，算係一門有潛力嘅生意，但黃金集團一日就升4成，好可能已反映有關利好因素。
同樣做柬埔寨賭業的，仲有一隻金界控股（3918），擁有當地唯一賭牌嘅金界，月前公布上市後首份業績，營業額為8541萬美元，純利為3261萬美元，分別增長逾3成，每股盈利為2.12美仙，並派發特別股息每股0.48美仙，令公司股息率增至逾7厘。睇好柬埔寨賭業，此股或有機會追落後。
億和長揸至有肉食
精密五金及塑膠模具生產商億和控股（838）上月宣布透過大摩以2.68元配售1.2億股，集資約3.11億元，配售完成後，公司股價未見炒味，反而跌穿配股價。是次集資，目的係用以興建深圳模具研發中心、蘇州第二期廠房及億和中山工業園，幾個新廠房完成後，產能將會倍增。
億和05年中上市，以1.10元招股集資1.28億元，跟住唔夠1年再以每股1.38元配售8000萬股，集資多1.1億元，連同今次集資已係第3次，反映呢個的確係一個資本密集嘅行業。今次集資同上次不同之處，係上次透過農銀配股，今次就搵到大摩搞，相信要搵到基金大客要貨唔會好困難，問題係揸工業股要好有耐性至得，上次億和配股後都要等幾個月至郁，但係有耐性的話，至今每股已賺咗超過1蚊。