話說一個月前有網友於討論區張貼一人洗衣機圖片，一post即爆，人人問津，過兩日熱到上埋《蘋果》網聞。那邊廂統計處話青年申請單身公屋人數6年來激增12倍，不過香港地屋貴兼且細，400呎擺到床放唔落櫃，市面上不少迷你家電及家具就好啱使！
記者：劉嘉蕙
攝影：陳偉強、劉嘉蕙
Model：Tobey
獨居女生部屋曝光
三千蚊租套房
姓名:阿B
年齡:23歲
職業:首飾售貨員
獨居年資:大半年
阿B大半年前以月租3,000元遷入深水埗一套房單位，她表示身邊朋友多離家自住，深水埗、旺角、土瓜灣一帶套房都是熱門選擇，「好似我呢個單位間開四個套房，其中兩間都係內地女大學生一個人住，有時行過會幫手搬吓嘢，教佢哋化妝，互相照應。」阿B住的套房面積約200多呎，一房一廳，除了客廳無窗稍為翳焗，兩三人走動轉身亦不算太迫狹。不過單位內廚廁合一，阿B為怕危險，所以甚少下廚煮食。
享受獨居生活
阿B說自己收入不高，家居布置力求簡便，至今連微波爐都未買。不過因有感出外洗衣價錢貴，半年前她從網上買下一台迷你洗衣機，外形如膠桶，體積剛好揳入廚房灶底，不過至今使用率不高。「洗衣機洗到三、四件衫，最理想係每日即除即洗，但要幫佢灌水出水，有時瞓着咗要彈番起身睇住佢。」不過她說半自動一人洗衣機算是耐用，「地方淺窄錢銀有限都算係咁」。套房月租加上水電雜費、上網費、基本生活開支等，阿B坦言：「一個人住真係儲唔到錢，放假亦唔會特別去街，喺屋企上吓網、玩吓狗又一日。」雖然生活開支增加，阿B仍偏好獨居生活，「返工已經好攰，返屋企仲要俾人日哦夜哦！自己一個人住，懶起來唔洗面唔沖涼都冇人理你，舒服好多。」
迷你部屋洗衣機$488（D）
迷你洗衣機外形似玩具，機身輕巧，一分鐘200轉，每次可洗三、四件衫，洗床單都無問題。功能方面特設左右迴旋水流，雖然無脫水功能要自己擰亁衫，但斷估亁淨過自己用手洗。洗衣機有出口歐盟CE認證，易裝易拆，唯一缺點係要自己灌水同「散水」，洗一日係情趣，日日要「睇水」就有啲煩。店主話勁多單身人士買，出貨半年來差不多一日賣出一部，亦有新任爸媽買來專洗BB衫，零舍衞生。
一人慳位家品
八杯水機$98（C）
日飲8杯水對身體及皮膚有益，女生自住更要學識照顧自己！容量約2L的水機能提醒你飲水飲到達標，店主話不少OL買返去擺喺office。
Innotech迷你熨斗$398（A）
熨斗板長約15cm，800w，軟膠手柄好揸手，仲可以做蒸氣熨，粉紅色賣相同少女部屋感覺最match！
多用途枱$228（D）
多用途枱重約3kg，可作6段高度及3段斜度調校。枱面係PP塑膠，大細擺laptop啱啱好，又可揳對腳入梳化底，玩貴妃椅側瞓食公仔麵都得!摺起時厚約3cm，用完時收埋極之方便。
一人開餐工具
微波爐烚蛋器$45（B）
早前新聞話有人用微波爐叮蛋搞到爆炸，想食烚蛋又懶開火可以用微波爐烚蛋器，倒入指定刻度的水，5分鐘食得，想半生熟都得。
多用途開蓋器$65（B）
女仔自住總有些小問題難解決，膠樽樽蓋唔夠力開點算？做咗水晶甲開唔到汽水罐點算？扭斷罐頭匙冇嘢食點算？多用途開蓋器可以扭開膠樽樽蓋、開罐頭匙、開荷蘭水蓋兼𠝹開密實袋，方便有如上帝之手。
Cuisintec迷你萬用鍋$298（A）
萬用鍋750w唔黐底，可以打邊爐、煎蛋、煮飯同煎扒，買少幾個煲之餘，一人晚餐亦變出無限可能性。
迷你奄列煎板$168（B）
女生煮飯又想靚又怕煩，迷你奄列煎板方便又好玩，倒晒配料再打隻蛋，係咁意翻幾翻，未食望落都開心一晚。
Cuisintec迷你電飯煲$398（A）
住套房地方捉襟見肘，呢個迷你電飯煲250w，一人份量，廚房擺完煲仲放得落兩碟餸。
齊齊評 一人家電
街訪多名女生，一人洗衣機以壓倒性姿態贏得眾人芳心，成為一人家電王。
Kitty
最鍾意部洗衣機，細細個夠實用，一人份量fit晒。
Candy
洗衣機幾得意，又唔貴，如果一個人住都會考慮買。
Wing
洗衣機size迷你，揳入枱底都得，個款都唔錯。
Julia
最buy叮蛋器，純粹貪得意，擺屋企當裝飾都幾好。
售賣點
（A）住好啲（28905555）銅鑼灣霎東街禮頓中心2/F
（B）GourmetKitchen（21750098）尖沙嘴海港城3301號舖
（C）心意Guide（67360402）九龍灣淘大商場一期2樓創業徑A7號舖
（D） http://www.fitboxx.com
（81045000）