唔講唔知，上市公司出年報係有規定，要喺開股東周年大會之前21日，又或者喺財政年度完咗嘅四個月內，寄到股東手上。不過，上星期新上市嘅洛陽鉬業嫌麻煩，扭計唔出年報。
洛鉬主席段玉賢喺公司通告話，喺4月26日先至上市，招股書入面乜都講晒，包括舊年公司條數，佢話要再印年報，「只帶來不必要的繁重負擔，且不切實際。」段總仲話，雖然冇年報喺手，但股東利益冇受損，而且承諾喺7月前派特別息時，會交代今年更多資料。不過，聯交所當然唔肯，講明正深入研究事件，又話會保留追究權利。
洛鉬有超過20萬股東，年報未必個個睇，所以要特登再印未必環保，但認購人數同洛鉬叮噹馬頭、喺4月20日掛牌嘅碧桂園，雖然招股書都寫晒舊年全年條數，但都好乖咁喺4月25日出咗年報，對洛鉬點都有啲壓力。
[email protected]