「傳媒大亨」新聞集團（NewsCorp）揸fit人梅鐸叔叔，呢期最巴閉，威盡全世界！因為佢前日開出天價390億元，全面收購道瓊斯公司（DowJones&Co.），咁震撼嘅大動作，佢應該已經周身唔得閒至係。
不過，原來同一時間，佢老哥N年前向小小超李澤楷買落嘅星空傳媒（StarTV）亦有異動，宣布同喺內地好吃得開嘅劇集股「勤＋緣」合作拍連續劇，仲搵咗個好殺食嘅劇本──家喻戶曉嘅《衛斯理》，今年9月就會開拍，首齣30集全部以《黃金故事》做藍本，每集揼水60萬至80萬人仔，計劃09年賀歲檔期喺內地首播。
勤＋緣事頭婆梁鳳儀話，佢哋啲劇集過往賣埠到東南亞，都係靠錄影帶，賺得唔多，而StarTV除咗唔多入到大陸市場，其他都做到有聲有色，今次雙方合作為期5年，實掂咁話。
古仔夠撐 唔搵巨星
不過，講開邊個演衛斯理，過去演過嘅有許冠傑、周潤發、劉德華等，無綫拍過嘅劇集就由羅嘉良擔正，不過呢啲星全部都out晒。梁鳳儀話，呢套小說係人都識，即係話齋古仔都夠撐，冇必要搵巨星擔正，佢哋遲啲會喺台灣同大陸，搞個男女主角新人選拔戰，但時間就未定喎。
華華忍唔住問，如果香港人都想爆紅，點報名先？梁鳳儀回應，公司嘅劇集不嬲都係普通話收音，之不過選拔戰仲未進行，或者遲啲會有安排喎。咁睇怕港人第時想喺電視或電影圈有得發圍，首先要學好普通話至得嘞。
[email protected]