腦筋靈活、口才了得嘅人，喺零售業界幾時都咁搶手，網友小熊維尼喺《新華論壇》就介紹咗一位仁兄，如果彤叔諗住分拆上市嗰間新世界百貨，有個咁嘅超級售貨員，散戶就真係要瞓身去抽嘞。
最佳Sales唔少得佢
話說一個鄉下出嚟嘅後生仔，走去一間號稱世界最大、應有盡有嘅百貨公司應徵做售貨員。
老闆問：「你以前做過售貨員未？」
後生仔答：「我以前喺村裏面做小販，都有逐家逐戶推銷。」
老闆好鍾意佢咁機靈，「咁你聽日返工啦，放工前我會嚟睇吓你做成點。」
翌日，後生仔企足成日，終於撐到就嚟放工，咁啱老闆就喺呢個時候嚟到，問佢：「今日開咗幾多張單呀？」
後生仔話：「得一張。」
老闆跌晒眼鏡話：「我哋呢度嘅售貨員，一日基本上可以開到20到30張單。唉，咁你做咗幾錢生意呀？」
後生仔話：「30萬美金（約234萬港銀）。」
老闆呆咗問：「你點賣到咁多錢？」
後生仔娓娓道來：「係咁嘅，有位先生入嚟買嘢，我先賣咗個細號魚鈎畀佢，跟手賣多個中號魚鈎，後尾佢連大號都買埋；咁我咪賣埋大、中、細號嘅魚絲畀佢囉。跟住我問佢諗住去邊度釣魚，佢話去海邊，我就建議佢買隻船方便啲，仲帶佢去賣船專櫃，介紹咗隻20英呎長、兩個發動機嘅縱帆船畀佢。佢好鍾意，但醒起自己架私家車拖唔郁呢隻咁大嘅船，咁我咪帶佢去樓下汽車銷售區，介紹咗架豐田新款豪華型『巡洋艦』畀佢囉。」
老闆難以置信咁問：「個客入嚟買個魚鈎，你就做到咁多生意？」
都是衞生巾惹的禍
後生仔話：「唔係，佢其實係嚟幫老婆買衞生巾嘅，於是我打蛇隨棍上問佢：『星期六就咁嘥咗咪好可惜，咁好天點解唔去釣魚呀？』」
http://bbs.book.sina.com.cn/?h=/g_forum/00/10/04/view.php%3Ffid%3D91133%26tbid%3D1940&g=3&n=1
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]