落後股一發力，升勢難收，首長系噚日全線作動，首長國際（697）大升17.3%；首長科技（521）升8.4%；早輪推介的首長寶佳（103）亦升7.8%。噚日提及嘅深圳國際（152），大升勢尚未發動，但成交已增，等機會。
汽車股開始有勢，落後嘅駿威汽車（203）要優先留意，06年（12月年結）盈利22.86億元，升15%，今年聯營公司「廣州本田」產量大增，全年售車估有32萬輛，增23%，預測駿威盈利可上升至27億元，升18.1%，每股盈利0.36元，PE10倍計，股價3.60元；若PE上番同業平均的12倍計，股價已可見4.30元。幾間外資大行都看好駿威，目標價由3.65元至3.90元。
PE偏低，無疑吸引，但更令人心動嘅係「回歸A股」行動，消息話途徑有兩個，一個係持有駿威37.9%的大股東「廣州汽車集團」獨立上市，另一個就係「廣汽」再注資駿威，由駿威「親自」回歸。無論係邊種方式，都會令駿威的「內地PE」獲得釋放，對股價會有牽動作用。
內地汽車股飛升
內地汽車股今年有突出表現，頭5大上升股嘅升幅由150%至230%，PE由20倍至50倍。至於本港上市的7隻汽車股，頭6隻升幅由15%至75%，往績PE14至20倍；駿威排榜末，今年以來升幅不足2%，幾乎冇升過，公司一有大動作，股價升勢就會突圍而出。
駿威05年底向母公司收購汽車零件業務49%權益，06年提供全年貢獻，盈利大增至1.3億元，消息指母公司已計劃將汽車零件業務餘下權益注入，令駿威盈利進一步上升。
駿威及廣州本田都「大叠水」，廣州本田持有現金超過80億元，而駿威手頭現金亦有27億元，預期兩家公司未來均會投資新項目，以收購PE8至10倍計，遠比現金收息來得吸引，每年盈利可多2.5億至3億元。