恒生銀行總行樓下噚日打晒蛇餅，唔知嘅仲以為又有抽新股嘅表格派，原來係恒生開股東周年大會。
恒生今年首次喺地下幫股東登記，一大群小股東非常合作，乖乖地排隊登記，冇出現混亂場面；股東大會召開期間，小股東亦非常安靜，董事長邵銘高（圖右）多次問有冇問題，全場仍係鴉雀無聲。
華華記得，舊年有兩名小股東，為副董事長柯清輝（左）冇人工加而抱不平，噚日有人同董事長邵銘高翻舊賬，問點解今年冇小股東要求加人工，殊不知邵銘高笑說：「可能佢唔值啩！」柯大俠又點回應呢？佢話可能舊年加咗，今年冇人再提。總之大家得啖笑。
程志遠攝
[email protected]