花旗股市上個禮拜連續5日創新高，但係港股完全跟唔上，禮拜日人行推出宏調措施，禮拜一A股大發神威，但係港股收市就唔見咗兩百點，你話幾咁令股民失望。
昨日係假期，港股休市，前晚花旗股市跌咗落嚟，今日港股仲會有壓力，技術上港股跌到支持水平，但係淡友出擊嘅力度好猛，假期前嘅成交反映唔到，但係啲氣氛就令人感受到。國內股市休息到下個禮拜一，港股就俾國內呢個禮拜可能加息嘅憂慮困擾，淡友喺形勢上有啲着數。
花旗股市幾個指數嘅走勢轉淡咗啲，但係道指守穩13000關應該冇問題。納指同標普500齊齊跌到上升支持軌應該暫時可以守得住。
滙控C輪3517：滙控（005）宣布以170億元出售倫敦總部，第2大股東再增持滙控，股價或會借勢反彈，亦可能係好友托市嘅主要工具，可以諗吓短炒滙控C輪3517，上日報收57仙，槓桿25.3倍（有效18.7倍），對沖值0.71，正股𠵱家做144.3元，炒上可試146元同埋147.5元，升上呢兩個位，3517應該喺70仙同82仙樓上，正股跌穿143元止蝕。