奧雲番嚟喇！萬千寵愛在一身嘅英國人愛將奧雲，前晚終擺脫10個月嘅傷患，回歸綠茵場，作客雷丁場英超聯仲踢足全場冇「莫氣」；可惜，奧雲係人，唔係超人，就算強勢回歸都無法化腐朽為神奇，紐卡素最終輸0:1！
猶記得05年紐記以約2.5億港元由皇馬羅致奧雲，後者背負億萬期望，點知計埋日前場波，至今僅為球會上陣12次入7球；好衰唔衰，佢06世盃前觸傷，同時「觸傷」唔少球迷嘅心，今番唞咗10個月後復出，精神奕奕，只係個樣添加咗幾分蒼桑同憔悴，不過難得佢27歲保養得唔錯，球迷繼續叫佢「奧雲仔」都唔肉麻！
紐記雖係客隊，但「奧雲仔」正選上陣受盡觀眾歡迎，最可惜佢上半場一記入球，慘食詐糊，未能以此慶祝復出；奧雲賽後自言感覺良好：「今日同受傷之前判若兩人，身體『輕飄飄』，仲頂贏好多波㖭。」
雷丁前鋒傑臣51分鐘破網，令紐記以0:1見負；球隊輸波，但主帥羅達仍然笑晒口話：「只要奧雲恢復狀態，佢可以喺任何一支球會立足，我完全無擔心過佢嘅將來，但若談到重返國家隊，現時都係言之尚早。」