喺政商界均吃得開嘅王英偉，自從公布離巢瑞安後，大家都好關心佢嘅去向，有消息傳過，話佢可能會出任政府啲乜乜局長，但謠傳終歸係謠傳。自言熱愛打Golf嘅Wilfred，喺噚日五一假期，接受咗以起觀瀾湖聞名嘅駿豪集團老闆朱樹豪嘅聘書，出任集團副主席兼行政總裁一職，新公司搞咗個任命兼歡迎儀式。
點解偏偏揀駿豪呢？身兼多項公職嘅Wilfred笑話：「係朱博士嘅邀請，自己又好喜歡創新，好鍾意打Golf，但之前忙到冇時間打，今次加入駿豪，做嘢之餘又可以玩，所以真係好開心可以接受呢個挑戰。」
對於有人話佢會加入政府，佢就話，都想為市民服務，如果特首開聲一定會積極考慮，但冇人同佢接觸，而且剛接受新任命，暫未係時候。
觀瀾湖經已發展咗15年，至於有冇諗過上市，朱樹豪就話，暫時未有咁嘅安排，遲吓先。
[email protected]