內地股市資金氾濫，A股新高又新高，本港唔少H股已大升，要唞氣，輪到大落後二線中資股抬頭，呢類股份幾個月未郁過，一發力，升勢必急，升幅必大。
首長國際（697）係「爛瞓股」，但假前一發神威，不得了，衝上0.75元高收，一升就15%，而且個勢仲係好勁。首國之後，輪到邊隻？應該係佢，假前已有異動嘅深圳國際（152）。
深國成半年打橫行，在0.5元至0.6元間上上落落，大市升咗成2000點，冇佢份，又係隻「爛瞓股」。不過，呢輪炒落後股，深國終於郁嘞，假前收0.54元，逆市而升3仙，成交更大增到1.69億股，成個月最墟冚呢日，動力轉強，對辦！
深國炒落後，一抽上去，圖表即時出現多個入貨訊號，升勢可以好急，0.61元係徘徊區阻力，但資金一到位，話衝就破，好快可見0.72元；再睇月線圖，仲勁，照度上去，目標係0.85元。
深國係深圳市政府窗口公司，主要經營物流業務，並持有深高速（548）30.42%、武黃高速45%、及南玻A股22%權益。深國開車，有概念，就係業務重組同注資，陸續有來。
若售南玻將獲巨利
公司話到明，會進一步集中資源在主營物流業務，適當時候會減持非核心業務的投資，現時A股大升，出售南玻已係時候，聽講好快會有好消息。深國持南玻股權成本係6億元，全數出售，可獲利逾10億元。
06年（12月結），深國獲利2.2億元，減39%，但05年有非經常性收益9400萬元，而06年只得3800萬元，同時又因CB的衍生負債公允價值增加而出現賬面虧損8200萬元，不計此等項目，盈利其實仍有可觀增長。若成功出售南玻，07年盈利將大增，股價亦有好大刺激。
深國的物流業已進入高增長期，進一步注資，將令深國「如虎添翼」。深國現時已經營深圳7大物流園區中的3個，消息指深國會以「超筍價」獲注入物流中心及深高速權益，令盈利可再大幅增長。