上個禮拜，新鴻基有限公司（086）出咗06年年報，話晒都係本地證券行龍頭，華華梗係即時揭嚟昅昅，揭吓揭吓，見到右上角間公司名唔同咗嘅，變咗做新源基，華華開頭仲以為自己老眼昏花，但再睇真啲，唔係噃，係印錯公司寶號名喎。成本年報，有一半以上將右上角嘅公司名印錯，仲集中喺後半部嘅財務賬目披露度，唔知有冇含意呢？
睇怕都係編印公司搞錯，一時手快將「鴻」字打咗做「源」（圖），話晒兩字同倉頡碼。但印之前，新鴻基嗰邊冇理由唔睇清楚，尤其係自己公司嘅寶號名，如果變做新「熊」基就大吉利事。
華華好奇，究竟世界上有冇一間叫新源基嘅公司呢？喺網上Check吓，答案係有嘅，喺成都就有間叫新源基科技有限公司，話係搞信息產品喎。
[email protected]