華億新媒體（419）周一股價急升16%，成交亦急增至近25億股，因公司宣布獲前大股東兼執行董事高振順知會，於4月27日在市場按每股0.18至0.188元出售4200萬股，並已訂立安排，擬按每股0.17元再配售14億股，套現2.38億元，即高振順將合共減持9.78%股權，至4.54%，共套現約2.46億元。
呢次係繼月前向CBC全資公司SpeedySwift配售新股及認股權證後另一次減持行動，而沽至低於5%，日後再減持亦毋須再披露，算是正式抽身而退。CBC呢間由網通（906）前CEO田溯寧創辦之投資基金，月前以7仙接貨後則變成最大股東，而CBC其他股東，包括澳洲傳媒大亨梅鐸跟全球最大廣告公司WPP集團。
從炒嘅角度，但凡係呢類轉型及轉手嘅公司，最重要係睇有無上一手留低嘅「蘇州屎」，假如高氏唔及早沽晒手貨出街，現任大股東始終都會有顧忌，因怕炒上集資途中，會有人突然沽貨，咁股價想炒得起都難。也因此，華億有主要股東沽貨，反而被市場認為係好消息而唔係壞消息，逆市炒上。
冷股抬頭台泥終炒上
利基（240）上周一股價急升兩倍後，調整咗幾日，周一再升約3成，此股平日成交甚低，同大股東惠記（610）一樣屬於細成交一族，但自從傳出與新創建（659）扯上關係之後就忽然成交大增，由於惠記持利基逾7成權益，街貨可謂極少，股價自然容易大幅波動。升幅榜仲有一隻台泥國際（1136），周一升33%，連同上周五累積升幅逾60%，呢間由辜氏家族持有嘅水泥公司近年不斷減持手上台股如富邦金融及遠傳電信，將資金擴充產能，股價停滯咗幾年終有資金睇中炒上。