上個月放假去了英國玩，寄居於朋友阿姨屋企，屋主UncleGeoff和阿姨很好客，一到埗為我們準備了消夜，UncleGeoff還帶我們到家中每個角落參觀，發現60歲的UncleGeoff很愛懷舊，興趣亦很廣，舊書、舊唱片、錢幣、玩具車……等，高峯期曾同時擁有12部電單車，即使現在車房內還有3架50、60年代的電單車，他說這幾架老爺嘢行得走得，唔信？明早起來兜一轉吧！阿伯Out？我就話In到爆，古老當時興嘛，有啲嘢真係有錢都買唔到。
記者：陸伊琳 攝影：陸伊琳、Nero
人肉百科全書
UncleGeoff之前從事建築物勘察工作，現在過着退休生活。興趣多多的UncleGeoff收集了很多30至60年代的東西；有1883年鋼琴、1938年的NationalGeographic、黑膠唱片。50年代的有玩具車、砌圖、留聲機……他不只儲，對每一樣珍藏的背景、內容都瞭如指掌。他愛看不同的書，熱愛旅行，只要是80年代之前的東西，他都會知道，不只是人肉百科全書，本身也是地圖王，每每出門，歐洲各地以至香港，只要地圖在手，去到邊都難不倒他。不過他亦有弱點，對於先進的科技嘢感到頭痕，現在正努力學習上網及用電腦，望與後生一輩拉近距離。
不時失憶
講起心頭好乜都記得
他也好像一個大細路，成日都唔記得自己的眼鏡放喺邊，大頭蝦冇記性？又唔係，一講起車房嗰幾架電單車便滔滔不絕；幾多年車、幾時買、幾大c.c.等資料也記得一清二楚，仲攞埋本舊相簿Show晒擁有過嘅電單車，全部都係50、60年代出廠，而佢最愛英國古老品牌James、BSA、Excelsior懷舊電單車，點解？因為襟用兼有型。買返嚟幾多錢？阿姨即搭嘴：「Geoff買得嘅，一定唔慌貴，我哋試過去郊外旅行，見到有架爛車冇人要，興之所至就搬返屋企，再慢慢整！」UncleGeoff喜歡這些舊電單車另一原因，就係可以自己動手去修理，他仲埋怨時下好多新車太依賴電腦，好多機件一壞就攞返廠整，完全無玩車味。
個仔唔鍾意
好價賣掉心頭好
回想1962年擁有第一架電單車BSABantam，再一路買買買，最高峯同時擁有12架之多！阿姨在拍拖時至現在都十分支持Uncle玩車，只是嫌坐電單車唔多舒服。不過Uncle個仔仔一點也沒有遺傳爸爸的嗜好，對於電單車不大感興趣，沒有人繼承，惟有一遇到有心人及好價便放掉手上珍藏，家陣只剩下3架。
某朝清早，我們一行人還好夢正酣，Uncle在樓下一着匙，隻腳起勢咁踩，電單車發出原始的「突突突……」聲，死氣喉噴出白煙，吹來一陣汽油味，先把我們家中大少嘈醒，探頭出窗望個究竟，然後再吸引一位鄰居駕着1953年的Austin古老車到來，他不是投訴，只是過來八卦、吹吓玩車心得，老遠望着他倆的臉，滿足及幸福溢於言表。
