以前父母都想仔女做醫生、律師，今時今日呢，華華就話讀會計好，睇吓華潤創業班高層嘅人工就知，薪酬最高嘅唔係主席宋林，而係兩位副董事總經理姜智宏同劉百成，兩人點解薪酬高過舵手華華就唔敢講，但就知兩人都係會計師。
睇年報，宋主席06年薪酬一共304萬人仔，加咗11%，但都高唔過劉百成前年嘅人工，更何況劉生06年都有加3%到396萬，而姜智宏由303萬加到326萬，增7.5%。
姜劉兩位副董事總經理都有會計師牌，係本地出產嘅專業會計師，兩人夾埋有成五十年核數經驗，相信呢啲就係佢值錢嘅地方。
而宋主席呢，咪以為佢身兼華潤置地同華潤電力嘅主席，加埋薪酬就一定會好多，查實佢喺華潤置地只係收執董嘅6萬人仔袍金；華潤電力未出年報，05年年報就話佢有126.8萬嘅。
[email protected]