唔經唔覺，港交所主席夏佳理上任已經一周年，呢一年港股市值大漲兼創新高，但係講到癲，始終唔及內地股市，連中央出手話宏調都唔理，照創新高，連新股都升過一倍。華華早兩日同夏主席傾開，佢話咁嘅情況，令佢聯想到香港七十年代初。
當年香港股市曾經令唔少人如癡如醉，連政府都出手降溫，以消防條例禁止股民進入遠東交易所買賣股票，即所謂「派消防員去交易所救火」，但係都冇乜用。
買礦務股 揭假報告
72年上市嘅香港天線，夏主席原來都有認購，睇住佢由1元升到30元，於是即刻去車行試吓保時捷911，諗住沽貨買新車，點知有個老友同佢講，隻股會見100元，夏主席又覺得架車好似細咗啲，就係咁一念之差，咪講話買車，最後連渣都冇得剩。
不過最慘情嘅係，有另一個老友拍佢膊頭，叫佢捱義氣，免費幫香港天線做清盤，你話做律師嘅夏主席點會唔一殼眼淚。
慘痛經歷唔止一個，夏主席又話，喺60年代尾喺澳洲試過買礦務股，點知後來揭發啲礦藏報告係假嘅，股價直插谷底。自此以後，佢對新股都好有戒心。
咁夏主席近年又有乜投資心水呢？佢話自己睇好銀行、保險同資源股，至於包括乜嘢股份，佢話作為行政會議成員，佢嘅投資都要喺行會作利益申報，可以去查吓。不過華華睇番，要喺公司持股量5%先至公開披露，要睇夏主席個投資組合都唔容易。
[email protected]