華懋集團已故主席龔如心留下千億遺產，引發龔家後人與風水師陳振聰展開爭奪戰。龔如心一生精采傳奇，不但電影公司想拍她的故事，連千面笑匠詹瑞文與妻子甄詠蓓合演的民初舞台劇《蛇鼠一窩》，也打小甜甜的主意，日前二人為新劇拍攝宣傳海報時，便仿傚龔、陳兩人的合照，效果爆笑。
詹瑞文繼舞台劇《萬世歌王》及《男人之虎》叫好叫座之後，這位舞台劇發燒友又有新猷，定於今年10月中在尖沙嘴文化中心公演新劇《蛇鼠一窩》，暫時先開6場，劇情與龔家爭產事件相似，不過該劇以民初時代為故事背景，劇情講述一個叫「多努多得」的城堡有人去世，城堡內有三人各自找到一份遺囑，他們均聲稱自己是遺產繼承人。
爭產諷刺
遺愛至親終成遺憾
日前詹瑞文兩夫妻為《蛇》劇拍攝宣傳海報，二人以小甜甜龔如心與風水師陳振聰的合照來作海報藍本，詹瑞文穿女裝束起孖辮坐在椅上，其妻則反串穿唐裝模仿陳振聰假哨牙來拍照。詹瑞文在影樓內看着自己一身女性打扮，也不禁說：「真係幾似小甜甜喎！」後來他又換回男裝繼續拍照，無論唐裝或西裝的造型均維妙維肖，果然堪稱「扮嘢泰斗」。
對於自己將小甜甜故事搬上銀幕，詹瑞文說：「我無意醜化佢，只不過佢件事咁hit，我先將部份情節加入齣新劇度。其實我一早搞緊一個偵探故事《蛇鼠一窩》，個古仔原本都有爭產事件，𠵱家發生咗小甜甜爭產事件，咁我先加入咗唔止一張遺囑呢啲元素入去。其實香港人係由祥哥（新馬師曾鄧永祥）開始認識爭產，我覺得爭產都幾諷刺，人死咗留低遺產畀最愛嘅人，但最愛嘅人就為遺產出現紛爭。」
詹瑞文指小甜甜的愛情故事既浪漫又傳奇，而且充滿神秘感，他說：「外人睇小甜甜，可能覺得佢行為同打扮好古怪，但我覺得佢無視外邊人點睇佢，我行我素，有錢得嚟依然有夢想同願望，真係一個好傳奇嘅女人。記得當年我搞舞台劇唔夠經費，真係有衝動想寫信畀佢，希望佢可以支持我嘅劇團，但最後我都冇寫呢封信。」
局中有局
盼遺產歸華懋基金
看過龔如心與陳振聰的合照後，詹瑞文說：「陳振聰個樣都幾自信，佢發呢張相出嚟，背後一定有個耐人尋味嘅故事。不過點都好，我最希望小甜甜嘅遺產最後都係落喺華懋基金，可以幫助到有需要嘅人士。」
至於詹太甄詠蓓則強調此劇想帶給大家的訊息，是反思立遺囑的動機是否遺愛，她指小甜甜生前與老爺為丈夫遺產已打了很久官司，想不到死後自己的遺產也出現紛爭，甄詠蓓說：「我始終覺得佢同風水師嘅合照係局中有局。」
採訪：李珮洳
最高蘋嬸
我蘋嬸都好期待睇詹瑞文扮小甜甜，提議佢搵埋顏福偉客串同唱主題曲，再隨票附送白花油一支，咁就一定爆啦！
蘋果娛樂特派評述員蘋嬸
