當眾歌手都視紅館為指標、日望夜望在該處開個唱之時，陳奕迅（Eason）卻反潮流，喜歡在校園搞騷。他一反歌手「傳統觀念」，不覺自貶身價，愛與觀眾近距離接觸，但談到早年演出校園騷不慎弄傷下體，他謂以後會小心，不會站近台邊。
不知何時開始，大部份香港歌手都盼望在紅館開個唱，一場紅館騷就如同事業上的一張輝煌成績表。陳奕迅卻剛好相反，愛唱校園騷尋找樂趣，今日他便為MOOV於樹仁大學舉行音樂會。
「互動較多」
Eason日前接受訪問時說：「有啲歌手嘅概念係到某個地位，覺得返去唱校園騷就係身價低咗，但我又唔覺得會係咁。其實紅館騷係睇整個製作，但校園騷可以同觀眾距離更近，互動較多，而且我又唔使兼顧太多嘢，只需要唱歌，free好多。」
其實Eason也曾回母校聖若瑟小學演唱，若將來女兒康堤的學校邀請他唱歌，他也不會推辭，他說：「之前母校嘅老師搵我返去唱《超人的主題曲》，佢哋話班小朋友鍾意，我冇所謂，仲覺得好開心。將來個女間學校真係搵我，唔嫌我老，都可以唱㗎。喺學校搞騷好開心，可能氣氛集中啲，連自己都會唱得癲啲，變得唔覺自己30幾歲，後生咗㗎。」
「真係痛㗎」
不過多年前Eason於台灣出席一個校園騷，因為太過投入表演，不慎發生「爆蛋」意外。雖然沒有留下陰影，但會更加警惕，他說：「以後小心啲囉，唔會企太近台邊，嗰次係唱得開心到乜都唔理，冇歌送畀大家，咪飛頂帽出去囉，咁就一跣，係個衝動小意外，下次真係唔會再係咁，真係痛㗎！」
採訪：王連連 攝影：陳俊強
