我悠穎馳愛車如命，平日當然都會經常走去車展睇車啦，不過一般嘅車展其實來來去去都只係一架架車泊喺度俾你睇，你話好似我呢啲忠實車迷就話唔怕悶、睇得津津有味啫，但帶埋女朋友去睇嗰陣就真係驚悶親佢㗎。不過嚟緊有個車展就唔同咁講法，呢個車展唔單止會展出400部新車畀我哋啲車迷慢慢睇，仲有好多緊張刺激嘅表演節目，無論鍾唔鍾意車嘅都肯定睇得開心盡興。
講緊嘅係富利堡車行為慶祝16周年誌慶所搞嘅「人頭馬添馬行空車展」，呢個車展會喺今日至5月6日上午10點至下午7點喺金鐘添馬艦舉行，會場之內除咗睇靚車，亦可以即場喺私家賽道試車，仲會有多項緊張刺激嘅真人表演，包括退休警察部駕駛訓練教官親身示範反追蹤駕駛技術、環保汽車技術講座、Lotus跑車扭樽表演等，成個嘉年華會咁熱鬧，無論大人定細蚊仔都一樣會睇得咁開心，直情當係一家大細嘅假日節目都得喇。
悠穎馳
豪邁不羈，愛車如命，聽幾下引擎聲就知咩車！