梁朝偉同周潤發早前相繼辭演吳宇森執導嘅《赤壁》，後來偉仔突然食回頭草，由飾演諸葛亮改為演周瑜，日前吳宇森聯同監製張家振專程由內地返港，搵偉仔傾合約同劇本。聽聞偉仔對劇本都有意見，提出咗唔少個人見解，吳宇森聽完之後都應承話返去再執吓個劇本。
偉仔食回頭草緊張
當初偉仔同發哥先後辭演，最大原因係同劇本有關。兩人曾對傳媒表示唔夠時間準備角色，監製張家振就反駁發哥，話一早已經畀咗劇本佢。
據知《赤壁》劇本一直喺度修改，改動咁大，發哥所收嘅劇本早已過時。既然偉仔肯捱義氣接番部戲，當然唔想佢衰，咁佢提出嘅意見如果真係幫到部戲，吳宇森都會尊重。
發哥獲終身成就獎
講番發哥，佢得到由美國AZN有線頻道舉辦嘅「2007AZN亞洲傑出人士大獎頒獎典禮」（AZNAsianExcellenceAwards），頒發終身成就獎，著名時裝設計師VivienneTam則獲頒VisionaryAwards，日裔名廚松久信幸（NobuMatsuhisa）就獲頒PioneerAward。頒獎禮將於本月16號喺UCLA嘅RoyceHall錄影，28號播放。
發媽噚日出席駐港解放軍嘅慶祝香港回歸10周年活動，對於囝囝辭演《赤壁》，佢笑笑口話：「佢都咁大個，鍾意做咪做，唔鍾意做咪唔做囉！」
