炒樓定炒股好？長遠嚟講，投資邊瓣賺錢最多，其實好難計，不過《CNNMoney.com》就做咗個比較，由投資者衡量邊種投資工具最啱自己。
回報表現股市領先
過去幾年美國樓市當旺，01至06年樓價平均按年升咗12.4%，多過股票市場嘅4.3%。不過，長遠嚟計，股市表現卻跑贏樓市。喺78至04年間，樓市按年回報只得8.6%、商廈9.5%，但標普就高達13.4%。
槓桿比率買樓大勝
買樓嘅入場費，投資者最少要畀樓價半成。如果畀兩成首期買一間50萬美金嘅物業，兩年後樓價升至55萬，賬面賺5萬，即係付出嘅10萬蚊首期有高達50%回報。但如果諗住用槓桿方式借孖展炒股，可借嘅金額根本唔會超過購買價嘅50%；若全數用嚟玩期權，仲分分鐘有機會蝕到連渣都冇。
交易成本股票有限
買樓前，要畀錢查間屋嘅「身世」、經紀佣金、律師費及其他雜費，間屋上會要畀按揭利息，仲要應付家居保險、維修保養等開支；放盤或招租要預留一筆錢賣廣告、畀經紀佣金等。買賣股票或基金嘅交易成本，相對就少好多。
稅務優惠物業多多
喺美國，買樓造按揭可以減稅，轉售獲利所得，頭50萬蚊仲可以免稅㖭！
透明度各有所長
股價會公開，仲不斷更新，賣畀任何人嘅價錢都一樣；樓價就由業主決定，買賣雙方需要角力爭取好價錢，偶一不慎就呻笨。不過，物業係有形資產，可以憑單位資料估值；但投資者好難單憑市場消息去判斷間公司有幾穩陣，稍有差池，股票就變廢紙，好似Enron、Tyco等，就算投資老手，有時都會老貓燒鬚。
物色買賣耗心血
投資物業要四出睇樓、物色買家或賣家、遇心儀單位又要討價還價，處理物業維修保養或者租客嘅問題，令人身心俱疲。投資股票？坐喺電腦前睇住個市同瀏覽相關資訊就得。
抗跌力磚頭有揸拿
上市公司一傳出不利消息，股價就會大幅波動。物業流轉唔及股票快，但進可攻、退可守，旺市時可以出售套現賺差價，市靜時放租都有收入。有調查發現，喺過去27年，樓市最差嘅一年，樓價跌咗3.5%，但標普500嗰年就曾跌22.1%。