韓國女星林秀晶早排同男歌手Rain合演電影《再造人之戀》，雖然電影票房仆直，但林秀晶喺香港就越嚟越多人認識。最近阿Net收到讀者cinnamonChu報料，話喺網上收集到一批林秀晶嘅舊照，真係令人不得不佩服韓國嘅整容技術。
自幼發明星夢
睇番林秀晶小學時期嘅學生相，當時嘅佢有大近視又有鬥雞眼，可以話同個「靚」字扯唔上一啲關係，阿Net相信當時冇人會估到佢將來會食娛樂圈呢行飯。
自幼已經發明星夢嘅林秀晶，出道前曾為雜誌擔任化妝模特兒，當時梳齊陰頭嘅佢打扮老套之餘，五官一啲都唔搶眼。經過一番改頭換面後，林秀晶嘅豬膽鼻已經變得又挺又直，五官睇落亦精緻得多。
雖然林秀晶喺韓國一向以氣質同演技取勝，不過阿Net最初見到啲相都嚇咗一跳，估唔到林秀晶之前嘅樣，同𠵱家相差十萬九千里。佢咁叻變面，難怪喺韓國可以攀上一線女星位置、導演朴贊郁要搵佢拍再造人嘅古仔啦！
版主：阿Net
本欄逢周一至六刊出