咁大棵仙人掌，好易拮親手喎？仲要放入口食，咪講笑！雖然明知仙人掌多刺又命硬，但當知道由墨西哥咁遠水路嚟到，食落好滑口又甘甜，而且用嚟炭燒、酥炸、剁茸撈麵，亦可榨汁整沙律，係咪對佢有所改觀呢？其實只需用刀、叉同匙羮就食得，好方便，用鉗剝刺咁麻煩嘅工序，就等師傅做啦！
記者：王俊榮 攝影：何家亮
Model：Priscilla（thegroup）
國際美食薈萃的中環蘇豪區出名多嘢食，中日法意泰數之不盡，位於伊利近街的Caramba，裝修充滿沙漠熱情風味，非常搶眼，一睇就知道係食墨西哥菜，餐廳更會於不同季節加入特色食材，適逢夏日將至，餐廳亦將墨西哥特產──仙人掌帶到香港，讓香港人食厭一般蔬菜時，多一個有益新選擇。
仙人掌天使麵沙律 $62
師傅先用油醋、檸檬汁、橙汁、蒜茸等香料炒香仙人掌，之後將一半仙人掌打成汁撈上意大利天使麵，另一半則切條上。天使麵軟腍而微酸味道較淡，仙人掌則爽口略帶苦而甘的味道，整個菜式味道加口感都做得非常平衡且醒胃。
炭燒仙人掌西冷牛扒 $142
用雜菜水煮過的仙人掌較濕身，燒過依然滑身多汁，沒有苦味，反而多了雜菜甜香，炭燒至半熟的新西蘭牛扒，淋上自製的香草牛油，令牛肉香滑可口。
仙人掌焗羊包配紅沙沙 $128
燜燉的羊柳拆骨切絲，加上芝士、大蒜、菠菜、仙人掌釀入玉米餅皮焗15分鐘，餅皮薄而香脆，仙人掌的甘香辟去了羊羶味，咬落感到肉汁咇晒出嚟㖭！
韋拉克魯斯汁伴吞拿魚柳及仙人掌 $142
將加拿大吞拿魚柳燒至半熟鎖住肉汁，外脆而內鬆化；韋拉克魯斯汁料用上番茄、黑水欖、墨西哥辣椒加仙人掌粒，酸味重又惹味，配合較淡味的魚肉啱啱好。
酥脆仙人掌辣茄湯 $48
用青茄、洋葱、薯仔打成湯，口感香滑，舌頭先感覺到濃郁薯仔加青茄酸香味，之後慢慢滲出墨西哥辣椒獨有的辛辣，層次感分明。食埋炸仙人掌片，脆口甘甜，剛好中和那股辛辣味。
墨西哥種肉嫩唔嚡口
來自墨西哥的仙人掌食用前會批皮去刺，Size如手掌般大，含維他命A、C和B群，而內含豐富的食用纖維，可刺激結腸內壁清除身體廢物，幫助消化避免便秘，屬一種非常健康的蔬菜。而大廚Stanley話：「中國同墨西哥都有出產食用仙人掌，但墨西哥品種比較薄身，肉質較嫩冇咁嚡口，所以好食啲。」
CarambaMexicanCantina（Soho）
地址：中環伊利近街26-30號（25309963）
營業時間︰12:00nn-12:00mn（周末延長至2:00am）
