時間：99年9月
地點：新加坡
人物：張栢芝
經過：98年張栢芝因為參演周星馳主演嘅電影《喜劇之王》而聲名大噪，但當年令佢更受注目嘅，竟然係老竇鬍鬚勇嘅江湖背景，結果栢芝受連累俾人落「江湖姦殺令」，全城哄動。
與父失聯絡
99年9月，當時傳聞有個澳門騎師俾人追債，鬍鬚勇出面代騎師「談判」，點知同江湖中人發生爭拗，有指當時某人俾煙灰盅扑穿個頭，縫咗12針。事發後有人誓要同鬍鬚勇算賬，仲話要姦殺佢個女栢芝。
消息曝光後，栢芝喺新加坡宣傳電影《星願》，面對「姦殺令」，栢芝話唔知件事真定假，如果真嘅話，佢會好怕，但就唔會影響佢情緒。雖然記招上栢芝全程笑容滿面，但大家都擔心佢嘅安全。
9月5日，栢芝返港舉行記招發表聲明，佢話呢個傳聞令佢好驚，但就強調香港係法治之區，所以唔會特別請保鑣或者搬屋，一講到仲未搵到老竇，栢芝泣不成聲。好在最後佢都安然無恙，仲越嚟越紅，舊年同謝霆鋒結婚，就快做媽咪㖭。栢芝一向咁鍾意小朋友，相信佢一定可以做個好媽媽！
本欄逢周一至周六刊出