香港銀行削減分行數目，搞到唔少市民怨聲載道，指分行不足，排隊等候嘅時間越嚟越長。原來內地居民仲慘過我哋，據《人民日報》報道，記者隨機走訪咗北京幾間銀行，平均等候時間係85分鐘，最長嘅167分鐘，最短都要56分鐘。喺排長龍嘅時候，更有一個70幾歲嘅天津阿伯因為忍尿而暈低。
普通客排隊個幾鐘
唔少大陸網友喺討論區留言，猛咁喺度呻，ZhangJugan就批評：「𠵱家啲銀行服務越嚟越慢，前幾日我同個客去銀行攞支票，就要排好耐隊；但係VIP櫃位就冇人排隊，空咗喺度都唔幫啲普通客。」Potato_007亦指：「擺明係歧視弱勢社群喇！呢種現象喺全中國都好普遍。」
Ywh_syem老實不客氣咁講：「咁多間國有銀行，以工行最衰，招行等商業銀行就好過佢哋多多聲。」我係離別釣亦好同意咁話：「我住喺東莞，呢度啲銀行真係變態㗎，好似間工行咁，有5個窗口櫃位，兩個畀VIP、兩個畀普通客，剩低嗰個就做出納，VIP櫃位空無一人輪候，但又同時開着；普通嗰兩個，通常就只開一個，每次去銀行都要排餐死，如果兩個鐘能夠搞掂，就真係要裝香還神喇！」
貧富待遇差天共地
Wogy就話有時都要怪吓啲客，佢哋唔肯用自動櫃員機轉賬攞錢，寧願排幾個鐘頭隊，「成日見到啲客攞嗰幾百蚊，或者存千零蚊、查賬戶都喺度排，其實呢啲嘢可以喺ATM度搞掂。」
銀行職員Jiankangen就留言申寃：「我哋一日要處理好幾百個客，攰到趴晒喺度，又話要講速度講效率，仲要俾啲客鬧，真係有寃無路訴。有時啲客拎叠亂晒嘅錢嚟，叫佢哋叠好啲錢再拎過嚟，十個有八個會話：『呢啲工作應該你哋做，點解要我哋搞。』又或者要啲客㩒個密碼，搞半日都未掂，我哋又可以點呢！」
http://www.tianya.cn/new/publicforum/content.asp?stritem=develop&flag=1&idarticle=113326&idwriter=0&key=0
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]