歐聯已經進入最後階段，邊隊入決賽，完全取決於那隊波係「零錯誤」！不過，世事總有例外，AC米蘭對曼聯，當AC可能冇馬甸尼，有狀態麻麻嘅廸達，而曼聯又後防不穩，莫非呢場歐聯4強次回合又大手交易？當然唔會，AC未踢，已經佔盡上風！
AC上次輸比曼聯，完全敗於加度素同馬甸尼傷出，以及安察洛堤保守作風！幸好有卡卡取得兩個作客入球，預計曼聯防線將面對好大壓力！根據統計，通常AC在首25分鐘攻勢強勁，多數可入波，如曼聯繼續用布朗，必出局！我亦好有信心AC可入決賽。
另一邊廂，利物浦對車路士，一直以來，作為車仔球迷，我真係好怕紅軍嘅謝拉特，佢係一位天才球員！不過，呢幾個星期，擔憂盡失！波歷克受傷後，林柏特成個生晒，打番車仔最擅踢嘅反守為攻，利物浦將面對攻又死、唔攻又死局面，我期待車仔會打出身價波。論爭勝決心，論教練部署，我認為車路士佔了上風！我不求車仔攞歐聯冠軍，只求1場精采比賽，殺入決賽願足矣！
周鵬
商業1台《球迷集中贏》主持
電郵：[email protected]