曼聯不單止喺英超威晒，連英冠都係！此話何解？皆因英冠兩個直接升班名額，由兩個前曼聯隊長布魯士同堅尼帶領嘅伯明翰、新特蘭奪得，「曼聯幫」玩晒。話分兩頭，兩個領隊知道升班時心情好唔同，布魯士擺明係緊張大師，堅尼就輕鬆得多，仲有心情去放狗。
堅尼輕鬆布魯士緊張
伯明翰、新特蘭提前1輪獲得直接升班資格，要多謝水晶宮周日主場2:0擊敗第3位嘅打比郡。據講，堅尼完全無理嗰場戰果，聽到升班消息嗰陣正喺街放緊狗。佢一手由新特蘭排尾2帶到升班後，將會好快同球會續約4年，同埋得到2,500萬鎊（約3.9億萬港元）擴軍。被寄予厚望，睇佢來季仲可唔可以咁輕鬆。
至於伯明翰領隊布魯士就冇咁風騷，佢重提以前降班同埋球迷今季曾要求佢下台嘅事，承認確定升班後一身鬆晒。好嘞，如今緊張完，布魯士為振奮球員士氣，周日仲喺屋企同職球員開P慶祝，咁識收買人心，果然有師傅費格遜影子。