當天星及皇后碼頭等歷史文物相繼被拆的同時，另一邊卻有人高呼要回望過去。好似美心集團旗下的中菜食府，特別組成廚師團，返廣州尋找有價值的老廣州菜。歷時兩個月的千挑萬選下，揀了28個經典廣州名菜，最耐可追溯至清末民初！我哋特登請到玩轉《美女廚房》的周中師傅及周祖堯師傅試食，睇吓啲菜有幾刁鑽。
記者：林佩婷
攝影：楊錦文
工序繁複 好考手工
身為怡翠軒主廚的周祖堯師傅（Max），今次都有份返廣州搵菜譜，其實香港咁多粵菜，使乜返廣州搵呀？阿Max就話：「就係因為香港好多粵菜都話新派，我哋幾位總廚就想將懷舊嘅廣州菜帶返香港。當時廣州有錢人食嘢好奄尖，所以工人每次煮飯都要搞好多工序，仲要不斷創新先可以滿足到大爺的要求。」今次他們分別向廣州老酒家如陶陶居、蓮香酒家、文園、大同酒家等取經，再搵舊食譜參考。每個菜工序繁複，最麻煩嗰道菜要預備4日，真係唔講得笑。
生扣霸王鴨 最有感情
Max15歲入行，佢印象最深刻的一道廣州菜係霸王鴨：「以前入行咩都唔識，見到師傅整呢道菜覺得好厲害，自己去廣州後，發現原來做法差唔多。」這道菜出自廣州蓮香酒家，先將鴨起骨再釀材料，咪以為過程好簡單，唔小心拮穿塊皮就要重新起過，單係拆同釀就要用4個鐘，煮好要用1日。內裏放入8種材料，上面撒鹹蛋黃碎。相傳撒得越多代表越霸道，所以先有霸王鴨呢個名。
玉簪桂魚卷 考刀工
出自廣州四大酒家之一大同酒家，亦為廣州四大名菜。這道菜可謂考驗大廚的手工，因為要將桂魚肉切成薄片，片片厚薄如一，包住冬笋跟雲南火腿，再用唐芹包住蒸，真係少啲工夫都唔得。
周中評語：一個字，掂呀！
燕窩鷓鴣粥 材料豐富
呢個雖然命名為粥，事實上冇用米。師傅先將鷓鴣起骨，再用刀背剁成茸，加上燕窩、蛋白同薯茸等材料，煮出嚟口感就好似食粥，故取名為燕窩鷓鴣粥。Max話呢個菜煲2分鐘就得，煲太耐的話會起渣同好「嚡」。
周中評語：個湯好靚，燕窩同鷓鴣份量十足，加多啲薯茸味道更協調。
豬油撈飯 夠懷舊
介紹咁多道菜，Max最推介豬油撈飯。他們特選最靚的泰國香米，連同竹筒一齊蒸，豬油則由自己提煉出嚟，加上豉油，味道比以前更好。
Max推介：每樣材料都經過精心挑選，個個都啱食。
鏡頭背後
周中師傅喺《美女廚房》中的生鬼表情的確能令節目氣氛更輕鬆，今次採訪更發現他喜歡撩女仔，大家睇睇佢一見到靚女侍應就眼甘甘，有相為證㗎！
怡翠軒
地址：中環樂廣場怡和大廈地庫B1（25245098）
營業時間：11am-3pm、6pm-11pm
推廣日期：即日至7月11日
註：美心旗下八月花、翠玉軒、海逸軒、翠晶軒、粵江春都有老廣州名菜供應。