轆Book　外柔內剛：<br>斯文掃把佬　狂風掃落葉

轆Book　外柔內剛：
斯文掃把佬　狂風掃落葉

你以為扮斯文就無人認到你咩？無用㗎，好似你啲咁出色嘅「掃把佬」，無論係用咗一套無咁惡嘅包圍，定係用咗四門房車嘅設計，你嘅BoxerTurbo引擎同棍波操控，都會令到你嘅表現好似同廠之中嘅Impreza一樣咁有辣味。講到尾，SubaruLegacySedanSpecB始終都係一款辣在骨子裏嘅「掃把佬」！

記者：周達之　攝影：譚盈傑、陳偉強
模特兒：Edmond

辣與唔辣　按掣即成

好多人覺得呢部LegacySedan套包圍唔夠惡，之但係人家係四門房車，要咁惡嚟做乜呢？不過，雖則佢外表斯文，但配備了富士獨家研發嘅SI-Drive智能駕駛系統，可以隨時改變部車嘅操控特性，可辣可唔辣，再加上呢部係手波版，你都咪話佢辣唔起！
SI-Drive分別有Sport、SportSharp及Intelligent三個模式。小記分別試過呢三個模式，先係Intelligent，呢個模式嘅好處係慳油，廠方話大約可以慳10%左右，踩油門嘅深度比其他模式較深，先至得到相同反應，相信原理係等你唔好下下都扯行副偈嚟行咁嘥油；Sport模式嘅引擎反應就比Intelligent敏感啲，操控節奏提升咗。至於SportSharp，齋睇個名都知佢係三個模式中反應最敏銳嘅一個，只要輕輕踩個油門，就有源源不絕嘅動力，感覺好High，絕對有狂風掃落葉之勢，但相反呢個模式亦係最食油嘅一個。

■車身重心低，行車穩定性相應提高。

寂寞中控台　勝在簡單易用

軚盤係Momo出品，好開心，軚盤上面有包括音響控制嘅功能按鈕，聽歌好方便，之但係中控台就顯得有啲寂寞，配埋Mclntosh音響憂憂鬱鬱嘅點陣式顯示屏，感覺簡直Cool爆。座椅係半桶式真皮設計，坐起上嚟穩定舒適。至於大尾廂同天窗都係例牌嘢，所以都無乜評論。
至於行車舒適性方面，話晒都係四門房車，所以LegacySedan嘅懸掛設定適中，即使用SportSharp嚟片彎亦十分舒適，片彎嗰陣條胎亦好咬地，值得一讚。